«قاراتاۋ الىبىنىڭ» قارىشتى قادامى

«قاراتاۋ الىبىنىڭ» قارىشتى قادامى

مەملەكەت باسشىسىنىڭ «ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىمەن جان-جاقتى تانىسقان «قازفوسفات» جشس «قاراتاۋ» تاۋ-كەن وڭدەۋ كەشەنىنىڭ ۇجىمى جۇمىسقا قىزۋ سەرپىنمەن كىرىستى. جولداۋدا «كاسىپورىندارىمىزدى جاڭعىرتۋعا جانە تسيفرلاندىرۋعا باعىتتالعان، ءونىمنىڭ ەكسپورتقا شىعۋىن كوزدەيتىن جاڭا قۇرالداردى ازىرلەپ، سىننان وتكىزۋ قاجەت. بۇلار، ءبىرىنشى كەزەكتە، تەحنولوگيالاردىڭ ترانسسفەرتىن ىنتالاندىرۋعا ءتيىس. ەلىمىزدىڭ بىرنەشە ونەركاسىپتىك كاسىپورنىن تسيفرلاندىرۋ جونىندەگى پيلوتتىق جوبانى ىسكە اسىرىپ، بۇل تاجىريبەنى كەڭىنەن تاراتۋ كەرەك» دەپ اتاپ كورسەتىلگەن.

مينەرالدى تىڭايتقىش ءوندىرىسى ءۇشىن فوسفور ۇنى مەن سارى فوسفور شىعارۋعا قاجەتتى ۇساقتالعان فوسفور كەنىن شىعاراتىن كاسىپورىنعا قاراستى «كوكسۋ»، «كوكجون»، «جاڭاتاس»، «دوڭگەلەك» جانە «توعىزباي» كەن ورىندارىندا الداعى ءتورت جىلدا ءوندىرىس كولەمى ءبىرشاما ۇلعايادى دەپ كۇتىلۋدە.
– قاتارىمىزعا جاڭا ءوندىرىس ورىندارىنىڭ قوسىلىپ جاتقانى حيميا سالاسىنىڭ كەلەشەگى زور ەكەندىگىن كورسەتەدى. زامان تالابىنا ساي ءوندىرىستى جاڭا تەحنولوگيالارمەن جابدىقتاي وتىرىپ، تسيفرلىق جۇيەنى ەنگىزە باستادىق. بۇل ەلباسىنىڭ جولداۋىنان تۋىندايتىن ماڭىزدى دا كەشەندى مىندەت، – دەيدى «قاراتاۋ» تاۋ-كەن وڭدەۋ كەشەنىنىڭ ديرەكتورى، وبلىستىق ءماسليحاتتىڭ دەپۋتاتى مۇراتقالي سارسەنوۆ.
ونىڭ ايتۋىنشا، الداعى ۋاقىتتا تاۋ-كەن ونەركاسىبىنە قاجەت تەحنيكالارى مەن قۇرىلعىلارىن الۋ ماقساتىنداعى ينۆەستيتسيا كولەمى دە ارتپاق. سونىمەن قاتار، 2016 جىلمەن سالىستىرعاندا 2021 جىلى تاۋ جىنىسىن شىعارۋ – 249،2، كەن ءوندىرۋ – 190،4، فكت-11 ءونىمى – 346،7، فوسفور ۇنىن ءوندىرۋ 306،5 پايىزعا وسەدى دەپ جوسپارلانىپ وتىر ەكەن. «شولاقتاۋ» تاۋ-كەن وڭدەۋ كەشەنى بويىنشا بۇگىندە 5 كەن ورنى جۇمىس ىستەيدى. 2021 جىلعا قاراي ولارداعى جۇمىسشى سانى 1552 ادامنان 2000-عا دەيىن ارتادى، ال ورتاشا ايلىق جالاقى 100 517 تەڭگەدەن 135 000 تەڭگەگە دەيىن وسەدى دەپ كۇتىلۋدە.
كەشەندە جۇمىسشىلاردىڭ الەۋمەتتىك جاعدايلارىن جاقسارتۋ باستى مىندەتتەردىڭ ءبىرى سانالادى. ءبىر اۋىسىمدا 60 ادامعا قىزمەت كورسەتەتىن ەمدەۋ-ساۋىقتىرۋ كەشەنى مەن «جۇلدىز» بالالاردى ساۋىقتىرۋ ورتالىعى كاسىپورىنداعى بارلىق ماماندارعا جانە ولاردىڭ بالالارىنا قىزمەت كورسەتەدى. 2017 جىلى «كوكتال» ەمدەۋ-ساۋىقتىرۋ كەشەنىندە 1030 جۇمىسشى-قىزمەتكەر مەن «جۇلدىز» بالالاردى ساۋىقتىرۋ لاگەرىندە 872 بالا دەمالدى.
جالپى، كاسىپورىن مامانداردى دايارلاۋدى، جاس ماماندارعا تالىمگەرلەر بەكىتۋدى جۇيەلى جولعا قويعان. 2017 جىلدان باستاپ بارلىق ءوتىنىش بىلدىرۋشىلەرگە جۇمىسشى بىلىكتىلىكتەرى بويىنشا تەگىن تەحنيكالىق جانە كاسىپتىك ءبىلىم الۋعا مۇمكىندىك بەرىلدى. بۇل – جاستارعا مەكتەپتىڭ جوعارى ساتىسىندا ءبىرىنشى جۇمىسشى بىلىكتىلىگىن تەگىن ۇيرەنىپ، قوسالقى قۇزىرەتتەر الدىق، ۇزدىكسىز كاسىپتىك دايارلىقتىڭ تاپتىرماس جولى.
كەشەن باسشىسى مۇراتقالي سارسەنوۆتىڭ نەگىزگى ۇستانىمى – ءوندىرىس سالاسىنا قاجەتتى مامانداردى جەرگىلىكتى تۇرعىندار اراسىنان دايارلاۋ. كاسىپورىننىڭ جاڭاتاس كوپسالالى كوللەدجىمەن بىرگە ايماقتىق ەڭبەك نارىعىنىڭ جوعارى بىلىكتى ماماندارعا سۇرانىسىن وتەۋ، بىلىكتى جۇمىسشى كادرلاردى بىرلەسە دايارلاۋ ماقساتىندا ءارتۇرلى ءىس-شارالاردى قولعا الىپ وتىرعانى دا، سوندىقتان. كوللەدجدە 2007 جىلدان بەرى «تاۋ-كەن ەلەكترومەحانيكالىق جابدىقتارىن جوندەۋ جانە تەحنيكالىق قىزمەت كورسەتۋ»، «ماركشەيدەرلىك ءىس»، «كەن ورىندارىنداعى پايدالى قازبالاردى اشىق تۇردە قازۋ» ماماندىقتارى وقىتىلۋدا. الەۋمەتتىك سەرىكتەس رەتىندە جاڭاتاس كوپسالالى كوللەدجىمەن اراداعى كەلىسىمشارت تا جىل سايىن جاڭارتىلىپ وتىرادى. اتالعان وقۋ ورنىمەن جۇمىس بەرۋشى تاراپتار اراسىنداعى كەلىسىمگە سايكەس نەگىزگى وندىرىستىك تاجىريبەدەن ءوتۋ، مەملەكەتتىك تاپسىرىس بويىنشا تۇلەكتەر قابىلداۋ، دۋالدى وقىتۋ جۇيەسىن دامىتۋ جۇزەگە اسىرىلۋدا.
كاسىپورىن كوللەدج تۇلەكتەرىن دايارلاۋدا تاۋەلسىز باعالاۋ ساپاسى ۇردىسىنە جانە مەملەكەتتىك ەمتيحان قابىلداۋدا الەۋمەتتىك سەرىكتەس رەتىندە بەلسەندى قاتىسىپ كەلەدى. كەشەندە 2016 جىلى – 86، ال وتكەن جىلى 95 ستۋدەنت تاجىريبەدەن وتكەن. وعان كوللەدجدىڭ 8 ارنايى ءپان وقىتۋشىلارى مەن ءوندىرىس شەبەرلەرى دە تارتىلدى. وقۋ ورنىندا دۋالدى جۇيەگە كوشۋدىڭ العاشقى قادامدارى جاسالدى. سونىڭ ارقاسىندا بىلتىر وسى وقۋ ورنىن بىتىرگەن 47 مامان كەشەنگە جۇمىسقا دا قابىلدانعان. كوللەدج بىلىمگەرلەرى مەن سارىسۋ اۋدانى اكىمدىگىنىڭ ءبىلىم بولىمىنە قاراستى مەكتەپتەردىڭ وقۋشىلارىن وندىرىسپەن تانىستىرۋ جانە وقۋعا تارتۋ ماقساتىندا «قاراتاۋ» تكوك بازاسىنا ساياحات ۇيىمداستىرىلىپ تۇرادى. كومبيناتتىڭ ەڭبەك ارداگەرلەرىمەن، ەڭبەككەرلەرىمەن وتكىزىلگەن كەزدەسۋلەر مەن دوڭگەلەك ۇستەلدەر بىلىمگەرلەردىڭ تاۋ-كەن ماماندىقتارىنا قىزىعۋشىلىعىن ارتتىراتىنى انىق.
جەرگىلىكتى اتقارۋشى ورگاندارمەن جاسالعان مەموراندۋم تالابىنا ساي 2017 جىلى بىردە-ءبىر جۇمىس ورنى قىسقارتىلماعانىن، كەرىسىنشە، 200-گە تارتا اۋدان تۇرعىندارى جۇمىسقا تارتىلعانىن اتاپ وتكەن ءجون.
ءوندىرىستى وركەندەتۋ ءۇشىن زاماناۋي تەحنيكا مەن تەحنولوگيالاردى پايدالانۋ قاجەت. وندىرىستە جانە الەۋمەتتىك سالادا دا جاڭا ۇلگىدەگى تەحنيكا مەن قۇرال-جابدىقتار ساتىپ الىنىپ، ورناتىلۋدا. اتاپ ايتقاندا، 2015 جىلدان باستاپ بارلىق كولەمدەگى اۆتوكولىكتەرگە «GPS» قوندىرعىلارىن ورناتۋ باستالدى. «GPS» – جەرسەرىكتىك جەلىلىك قوندىرعى. ەڭ الدىمەن اۆتوكولىكتەگى جانار مايدىڭ ۇنەمدى جانە ءتيىمدى پايدالانىلۋىن قاداعالايدى. سونىمەن قاتار، ساپارعا شىققان اۆتوكولىكتىڭ بەلگىلەنگەن باعىتتان اۋىتقىماۋىن باقىلاۋدا ۇستايدى. قوندىرعى قاداعالاپ، باقىلاپ قانا قويمايدى، قانداي دا ءبىر اۋىتقۋشىلىقتار ورىن العان جاعدايدا جەرسەرىكتىك جەلى ارقىلى كەشەن باسقارماسىندا ورنالاسقان ديسپەتچەرلىك ورتالىققا اقپار جەتكىزىپ، مونيتور ارقىلى كورسەتەدى جانە لەزدە دابىل قاعادى. ال ديسپەتچەرلەر ءتيىستى قىزمەتتەرگە حابارلاپ، دەر كەزىندە شارا قولدانىلادى. جۇمىستى ءتيىمدى ۇيىمداستىرۋعا قوندىرعىنىڭ تيگىزەر سەپتىگى مول.
ديسپەتچەرلىك جۇيەنى كەشەننىڭ «اقىل ورتالىعى» دەۋگە دە بولادى. سەبەبى، كەن ءوندىرۋ، وڭدەۋ، ولاردى تاسىمالداۋ باعىتىنداعى اتقارىلعان جۇمىستار تۋرالى بارلىق دەرەك وسىندا جيناقتالادى جانە كۇندەلىكتى اتقارىلاتىن جۇمىستاردىڭ كولەمى ايقىندالىپ، ءتيىستى ورىنداۋشىلارعا ناقتى تاپسىرمالار بەرىلەدى. تاپسىرمالاردى ورىنداۋ دا وسى ورتالىقتان باستاۋ الادى.
مۇراتقالي سارسەنوۆتىڭ باستاماسىمەن كەشەن باسقارماسىنا ورناتىلعان ديسپەتچەرلىك جۇيە كابينەتى دە جاڭارتىلىپ، زاماناۋي ۇلگىدەگى كەڭسە جيھازدارى قويىلعان. مەملەكەت باسشىسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنا وراي كەشەندە بىرقاتار ءىس-شارالار اتقارىلۋدا.
جەتپىس جىلدىق تاريحى بار «قاراتاۋ» تاۋ-كەن وڭدەۋ كەشەنىنىڭ بولاشاعى جارقىن بولارىنا سەنىم كوپ. بۇگىنگى تاڭداعى كاسىپورىننىڭ تىنىس-تىرشىلىگى بۇعان ناقتى دالەل بولا الادى.

قۇدايبەرگەن مامبەتوۆ،
جۋرناليست

سارىسۋ جانە تالاس اۋداندارى

About admin

Leave a Reply

Your email address will not be published. Required fields are marked *

*

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>