ءتول سپورتىمىزدىڭ تۋىن كوتەرگەن ارۋ

ادام بالاسىنىڭ ويلاۋ جۇيەسىن جەتىلدىرۋدە قازاقتىڭ ءتول سپورتى توعىزقۇمالاقتىڭ الار ورنى ەرەكشە. توعىزقۇمالاقتى جاھانعا تانىتۋ ءۇشىن بۇگىنگى تاڭدا مەملەكەت تاراپىنان قىرۋار جۇمىستار اتقارىلىپ جاتقانى بەلگىلى. ءيا، تاريحى ىقىلىم زاماننان تامىر تارتاتىن توعىزقۇمالاق – ناعىز ينتەللەكتۋالدىق ويىن. سوندىقتان دا «قازاقستاننىڭ 100 جاڭا ەسىمى» جوباسىنىڭ قاتارىنان توعىزقۇمالاقتىڭ جىلىگىن شاعىپ، مايىن ىشكەن مىقتىنىڭ كورىنۋى زاڭدى. بۇل – ۇلت تاڭداۋى.

بۇگىنگى تاڭدا ەلىمىزدەگى توعىزقۇمالاق ويىنىنىڭ جارقىن جۇلدىزى كىم دەسە، وسى سپورت ءتۇرىنىڭ قىر-سىرىنا قانىق كەز كەلگەن جانكۇيەر اسەل داليەۆانى ايتار ەدى. ول اتى اتالعان سپورتتىڭ عالامدىق دەڭگەيدە تانىلۋىنا سۇبەلى ۇلەس قوسىپ جۇرگەن جۇلدىزدارىمىزدىڭ ءبىرى ءارى بىرەگەيى. الەمنىڭ جەتى دۇركىن چەمپيونى اتانعان اسەلمەن قالاي ماقتانساق تا جاراسادى.

شىناشاقتايىنان ۇلتتىق سپورتتىڭ قۇپياعا تولى جۇمباقتارىنىڭ شەشىمىن تابۋ ءۇشىن بەلسەندى ەڭبەك ەتىپ كەلە جاتقان اسەل جيىرما جاسقا كەلگەنگە دەيىن جاستار اراسىنداعى ەلىشىلىك دودالاردا 6 رەت توپ جارىپ، ءوزىنىڭ شىن مىقتى ەكەنىن دالەلدەي بىلگەن. مۇنان سوڭ ەرەسەكتەر دۋىنا ارالاسقان ول 11 مارتە چەمپيون اتانىپ، كوپتەگەن حالىقارالىق الامانداردا قاتارىنىڭ الدى بولدى. ون التى جاسىندا حالىقارالىق دارەجەدەگى سپورت شەبەرى ءنورماتيۆىن ورىنداعان اسەلدىڭ بولاشاعىنان زور ءۇمىت كۇتتىرەتىن سپورتشى ەكەنىن كەزىندە مارعاسقا ماماندار سان رەت ايتقان-دى.
2013 جىلى ۇلتتىق سپورتىمىز توعىزقۇمالاققا ايرىقشا قۇرمەت كورسەتىلدى. اسەل ازيا ويىندارىنىڭ الاۋىن تۇتاتىپ، قازاقستاندىق سپورتشىلاردىڭ بايراقتى سىندا اتوي سالۋىنا تىلەكشى ەكەنىن بايقاتتى.
ءوزى تالاي دودالاردا ەل سەنىمىن اقتاپ، مەملەكەت مەرەيىن ارتتىرعان ساڭلاق جاس تا بولسا جاقسى ىستەردىڭ باسىنان تابىلىپ ءجۇر. 2015 جىلدان باستاپ اسەل داليەۆا جاتتىقتىرۋشىلىقپەن اينالىسادى. ءسوزىمىز دايەكتى بولۋى ءۇشىن اسەل تاربيەلەگەن لينا كاريموۆا ەلوردا تورىندە وتكەن ءتورتىنشى الەم بىرىنشىلىگىندە توپ جارعانىن ايتساق تا جەتكىلىكتى بولار.
ول ۇنەمى ىزدەنىس ۇستىندە جۇرەدى. تالاي بيىك شىڭداردى باعىندىرعان اسەل داليەۆانىڭ توقتاپ، توقىراپ قالعان كەزى جوق. قىزىلورداداعى قورقىت اتا اتىنداعى مەملەكەتتىك ۋنيۆەرسيتەتىن «دەنە شىنىقتىرۋ جانە سپورت» ماماندىعى بويىنشا تامامداعان كەيىپكەرىمىز ۋاقىت وتە كەلە كولىك جانە كوممۋنيكاتسيالار اكادەمياسىنىڭ ماگيسترى دارەجەسىن يەلەندى. «وزگە ءتىلدىڭ ءبارىن ءبىل، ءوز ءتىلىڭدى قۇرمەتتە» قاعيداتىن ۇستاناتىن اسەل ورىس، اعىلشىن، تۇرىك تىلدەرىن ەركىن مەڭگەرگەن پوليگلوت جان. بوس ۋاقىتىندا ادەبي كىتاپتار وقىپ، تەننيس ويناپ، سۋدا جۇزگەندى جانى سۇيەدى.
اسەلدىڭ توعىزقۇمالاق سپورتىنىڭ دامۋىنا قوسقان ۇلەسى نازاردان تىس قالعان ەمەس. جوعارى جەتىستىكتەرى ۋاقىتىندا باعالانىپ، ەل تاۋەلسىزدىگىنىڭ 20 جىلدىعىنا ارنالعان مەرەكەلىك مەدالىن يەلەنىپ، تمد پارلامەنتارالىق كەڭەسىنىڭ شەشىمىمەن «دەنە شىنىقتىرۋ، سپورت جانە ءتۋريزمدى دامىتۋداعى ەرەن ەڭبەگى ءۇشىن» توسبەلگىسىمەن ماراپاتتالعان.
تاراز تورىندە وتكەن توعىزقۇمالاق تۋرنيرلەرىنىڭ بىرىندە اسەل بىزبەن اڭگىمەلەسىپ، ءوز ويىمەن بولىسكەن-ءدى. «توعىزقۇمالاق سەكىلدى زياتكەرلىك ويىننىڭ وسكەلەڭ ۇرپاققا بەرەرى مول. ويلاۋ جۇيەسىن دامىتىپ، بيىك بەلەستەردى باعىندىرۋعا جەتەلەيدى. بۇگىندە ەلىمىزدە ۇلتتىق سپورتىمىزدى دامىتۋعا بارىنشا مۇمكىندىكتەر قاراستىرىلىپ جاتىر. قولداۋ بار جەردە ناتيجەنىڭ بولاتىنى بەلگىلى. شۇكىر، سپورتشىلارىمىز ءباسى باسىم دودالاردا قاتارىنىڭ الدى بولىپ، ەل مەرەيىن ارتتىرىپ ءجۇر. ەلىمىزدە تالانتتى جاستار جەتكىلىكتى. ولارعا دۇرىس باعىت-باعدار بەرىپ، جول نۇسقاي الساق، ءبىزدىڭ ءبىر ميسسيامىزدىڭ ورىندالعانى دا سول. بار ماقساتىم – وسى سپورتتىڭ الەمدىك دەڭگەيدە تانىلا تۇسۋىنە تامشىداي بولسا دا ۇلەسىمدى قوسۋ. جىگەرلى جاستارىمىزدىڭ تالابىن ۇشتاي بىلسەك، ول دا ءبىر تابىس ەمەس پە؟»، – دەگەن اسەلدىڭ اسقاق ارماندارى ورىندالاتىنىنا بەك سەنىمدىمىز. وعان العىشارتتار دا بارشىلىق.

تابيعات ابايلداەۆ

About admin

Leave a Reply

Your email address will not be published. Required fields are marked *

*

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>